Sabiq deputat, iqtisadçı Nazim Bəydəmirlinin barəsində həbs qətimkan tədbirinin seçilməsi ilə bağlı məhkəmə qərarından apellyasiya şikayəti verilib.

Bu barədə AzadlıqRadiosuna onun vəkili Aqil Layıc məlumat verub.

Onun sözlərinə görə, şikayətdə istintaq orqanının təqdimatının rədd edilməsi və qətimkan tədbiri barədə qərarın ləğvi məsələsi qoyulub.

Vəkil qeyd edib ki, N.Bəydəmirli 1 saylı Bakı İstintaq Təcridxanasında saxlanılır.

A.Layıc əlavə edib ki, N.Bəydəmirlini özü şikayət etdiyi iş üzrə həbs ediblər: "Nazim bəy səhmdarı olduğu "Avto-Garant" ASC-də pay bölgüsü ilə bağlı şikayətçi idi. Bununla bağlı da Daxili İşlər Naxirliyinə şikayət vermişdi, araşdırma aparılırdı".

Məsələ ilə bağlı "Avto-Garant" ASC-dən münasibət öyrənmək mümkün olmayıb.

Nazim Bəydəmirli və "Avto-Garant" ASC-nin idarə heyətinin sədri Elmar Musayev 2014-cü ildə “Avto-Garant” ASC-nin mülkiyyətçisi Ədalət Bağırov və qeyriləri tərəfindən E.Musayevin qanunsuz olaraq vəzifədən kənarlaşdırılması, 20 min manata yaxın pul vəsaitinin dövlət büdcəsindən yayındırılması, o cümlədən 1 milyon manatdan çox pul vəsaitinin xəzinəyə mədaxil edilməməsi barədə bir müddətdir istintaq orqanlara müraciət etmişdilər.

Lakin istintaq orqanları şikayəti əsassız olduğu barədə qərar vermişdi.

Buna da bax:

İranlı nazir Azərbaycanla münasibətlərdən danışıb

Xatırlatma

N.Bəydəmirli iyulun 4-də Daxili İşlər Nazirliyinin Mütəşəkkil Cinayətkarlıqla Mübarizə Baş İdarəsi tərəfindən saxlanılıb. Ona qarşı Azərbaycan Cinayət Məcəlləsinin 182.2.4-cü maddəsilə (xeyli miqdarda əmlak əldə etmək məqsədilə hədə-qorxu ilə tələb etmə) ittiham irəli sürülüb. Bu maddə 5 ildən 10 ilədək azadlıqdan məhrumetmə cəzasını nəzərdə tutur.

Bu gün məhkəmə onun barəsində 4 ay müddətinə həbs qətimkan tədbiri seçib. Bəydəmirli ittihamı rədd edib, onu uydurma adlandırıb və hüquqi əsasının olmadığını bildirib. Onun sözlərinə görə, həbsin əsl səbəbi Gədəbəy rayonunun Söyüdlü kəndindəki qızıl emalı müəssisəsinin ətraf mühiti çirkləndirməsilə bağlı yerli sakinlərin etirazları ilə əlaqədar çıxışlarıdır.

Buna da bax:

Keçmiş deputat Nazim Bəydəmirli 4 aylıq həbs olunub

İranın müdafiə naziri briqada generalı Əziz Nəsirzadə Ermənistana səfər edib.

Ermənistan müdafiə naziri Suren Papikyan bildirib ki, iranlı həmkarı onun dəvəti ilə bu ölkədə səfərdədir.

19 may

Zakir Həsənov İsraildədir

İranla birgə təlim keçirildiyi bir gündə, mayın 19-da Azərbaycan Müdafiə Nazirliyinin (MN) rəhbərliyi İsraildə səfərdə olub. Rəsmi məlumata görə, səfər çərçivəsində müdafiə naziri general-polkovnik Zakir Həsənov İsrailin müdafiə naziri İsrael Kats və Müdafiə Qüvvələrinin Baş Qərargah rəisi general-leytenant Eyal Zamir ilə görüşüb. "Görüşlərdə hərbi əməkdaşlığın inkişaf perspektivlərinə dair ətraflı fikir mübadiləsi aparılıb", - məlumatda vurğulanıb.

Hərbi ekspertlər İsrailin Azərbaycanın silah aldığı ölkələr içərisində başlıca yerlərdən birini tutduğunu deyirlər. Zaman-zaman İsrail Azərbaycan əməkdaşlığı rəsmi Tehranın narazılıq dolu açıqlamaları ilə də müşahidə edilib.

Azərbaycan İranla birgə hərbi təlim keçirir

Azərbaycan işğaldan azad edilmiş ərazilərində İranla birgə hərbi təlim keçirir.

Bu barədə Azərbaycan Müdafiə Nazirliyi məlumat verib.

Nazirliyin açıqlamasına görə, bu gün, mayın 19-da açılışı olan "Araz-2025" birgə təlimi işğaldan azad olunmuş ərazilərdə mayın 21-dək davam edəcək.

Birgə təlimə İran İslam Respublikasından cəlb olunan heyətin rəhbəri və digər iştirakçıları artıq bir neçə gündür Azərbaycandadırlar.

Halbuki, 2024-cü ilə qədər iki ölkə arasında münasibətləri gərginləşdirən bir çox olaylar yaşanmışdı. Xüsusilə, hər iki ölkənin bir-birinin sərhədinə yaxın ərazidə hərbi təlimlər keçirməsi qarşılıqlı narazılıqlar doğurmuşdu. Üstəlik, Azərbaycanda hakimiyyətə yaxın media qurumlarında İranda bəzi dairələr ölkənin işğal altında olan ərazilərində separatçı qurumları himayə etməkdə günahlandırılırdı. İran belə iddiaları təkzib edirdi.

2023-cü il yanvarın 27-də isə Azərbaycanın Tehrandakı səfirliyinə "Kalaşnikov" avtomatı ilə silahlı hücum da olmuşdu. Hədisə nəticəsində səfirliyin bir əməkdaşının həlak olduğu, ikisinin isə xəsarət aldığı açıqlandı. Bundan sonra səfirliyin işçiləri Azərbaycana təxliyə edildi.

Ardınca da Azərbaycanda bir çox həbslər oldu. Saxlananlar ən müxtəlif ittihamlarla (ən çox da narkotiklə) üzləşsələr də, hökumətə yaxın media qurumlarında onlar "İran casusu" kimi təqdim edilirdilər. Hərçənd onların yaxınları bununla dini kəsimdən olan bir çox şəxslərin şərləndiyini dedilər.

Amma xüsusilə son bir ildə hər iki tərəfin rəsmiləri bir-biriləri ilə əməkdaşlığa dair fikirlər səsləndirirlər. Ötən ilin iyulunda Azərbaycanın İrandakı səfirliyinin fəaliyyəti bərpa edilib. İki ölkə arasında birgə təlimlərin keçirilməsinə başlanıb.

Ermənistanla Qarabağ münaqişəsi üzündən Azərbaycan bir neçə on il ərazilərinin 20 faizinə nəzarəti itirib. 2020-ci ildə 44 günlük savaş, 2023-cü ildə isə birgünlük hərbi əməliyyatlarla Azərbaycan işğala son qoyub, bütün ərazilərində suverenliyini bərpa edib.

Beş nəfərin xəsarət aldığı olayın "Azərikimya" İstehsalat Birliyinin Etilen-polietilen zavodunda baş verdiyi açıqlanıb.

Yerli saytların məlumatına görə, Azərbaycan Dövlət Neft Şirkətinin (SOCAR) tabeçiliyində olan bu zavoddan bildirilib ki, saat 12:00 radələrində istehsalatın sintez sahəsində, "B" texnoloji xəttində aşağı təzyiq ayırıcısında reqlamentə uyğun təmir işi apararkən hadisə baş verib.

Əlavə edilib ki, hadisənin səbəbi araşdırılır.

Əsası ötən əsrin ortalarında qoyulan həmin müəssisədə sonradan modernizasiya işlərinin aparıldığı açıqlanıb.

+++

Bu gün, mayın 20-də Sumqayıt şəhərində yanğınla müşahidə edilən partlayış baş verdiyi və xəsarət alanların olduğu bildirilir.

Tibbi Ərazi Bölmələrini İdarəetmə Birliyindən (TƏBİB) verilən məlumata görə, partlayış səbəbi ilə saat 12:20 radələrində beş nəfər Sumqayıt Tibb Mərkəzinin nəzdindəki Təcili Tibbi Yardım Xəstəxanasına hospitalizasiya olunub.

"Vəziyyəti ağır qiymətləndirilən üç nəfər Nərimanov Tibb Mərkəzinin nəzdində olan Yanıq Mərkəzinə təxliyə olunur. Digər iki nəfərin müalicəsi isə müvafiq şöbədə davam etdirilir, vəziyyətləri orta ağırdır", - məlumatda bildirilir.

Yerli saytlarda hadisənin Sumqayıt şəhərindəki müəssisələrdən birində baş verdiyi vurğulanır. Amma hadisənin səbəb və detalları açıqlanmır.

Məsələ ilə bağlı, hələlik, zərərçəkənlərin yaxınları və Fövqəladə Hallar Nazirliyi ilə danışmaq mümkün olmayıb.

2025-ci ilin yanvar-aprel aylarında Azərbaycanın xarici ticarət dövriyyəsi 16 milyard 917.6 milyon ABŞ dollarına bərabər olub. Bu da ötən ilin eyni dövrünə nisbətən çoxdur. Ötən ilin ilk dörd ayında bu rəqəm 13.6 milyard dollar olmuşdu.

Bu barədə Dövlət Gömrük Komitəsindən (DGK) bildirilib.

DGK-nın vurğulamasına görə, son bir ildə ölkə üzrə ixrac 8 milyard 784.7 milyon dollar (7.5 faiz artım), idxal isə 8 milyard 132.9 milyon dollar (48.8 faiz artım) təşkil edib.

Amma xarici ticarət dövriyyəsində 651.79 milyon dollarlıq müsbət saldo yaransa da, bu, ötən ilin eyni dövrünə nisbətən 4.1 dəfə azdır.

Müstəqil iqtisadçılar idxal-ixrac əməliyyatlarında müsbət saldonun azalmasını neft hasilatının və qiymətinin azalması, qeyri neft-qaz ixracının lazımı səviyyədə artmaması ilə izah edirlər. Onlar hesab edirlər ki, Azərbaycanın idxaldan asılılığı getdikcə artır.

Hökumət 2025-ci ildə Ümumi Daxili Məhsulda (ÜDM) cüzi – 0.9 faiz artım olduğunu bildirsə də, müstəqil iqtisadçılar hətta bu rəqəmə belə şübhə ilə yanaşırlar.

"Telegram" sosial media şəbəkəsinin yaradıcısı Pavel Durov bildirib ki, Fransa kəşfiyyatı ondan Rumıniyada keçirilən prezident seçkilərinin ikinci turu ərəfəsində mesajlaşma tətbiqində rumın sağçılarının şərhlərini silməsini istəyib. Lakin Fransanın Xarici Təhlükəsizlik Baş İdarəsi (DGSE) bu ittihamı rədd edib.

Durov mayın 18-i axşam – Rumıniyada səsvermə günü – sosial şəbəkədə paylaşım edərək bildirib ki, Fransa kəşfiyyatının rəhbəri Nikolya Lerner ondan Rumıniyada seçkilər ərəfəsində mühafizəkar səsləri qadağan etməyi xahiş edib. Durov bu tələbi yerinə yetirməkdən imtina etdiyini deyib.

Səsvermə 54 faiz səslə Danın gözlənilməz qələbəsi ilə nəticələnib. Bu seçki noyabrda keçirilmiş ilkin seçkinin ləğv edilməsindən sonra baş tutub. Həmin seçki sosial şəbəkələr vasitəsilə Rusiyanın müdaxiləsi iddiaları səbəbiylə ləğv olunmuşdu.

DGSE mayın 19-da yaydığı bəyanatda bildirib: "DGSE seçki prosesi ilə əlaqəli hesabların qadağan olunması ilə bağlı hər hansı bir tələb irəli sürüldüyü iddialarını qəti şəkildə rədd edir".

40 yaşlı Durov əvvəlcə bu tələbin "Qərbi Avropa hökuməti" irəli sürüldüyünü iddia etmişdi. Həmin paylaşımda o, həmçinin fransız baqetinin emojisi də işlətdiyindən söhbətin Fransadan getdiyi ehtimal olunurdu.

Durov daha sonra paylaşım edərək Fransanın kəşfiyyat rəhbəri Lernerin adını birbaşa qeyd edib.

DGSE isə açıqlamasında bildirib ki, son illərdə bir neçə dəfə Durovu "şirkətinin və şəxsən özünün terror və uşaq pornoqrafiyası ilə bağlı təhlükələrin qarşısının alınması baxımından daşıdığı məsuliyyətlər" barədə qəti şəkildə xəbərdar etməyə məcbur olub.

Durov ötən ilin avqustunda Paris yaxınlığındakı hava limanında saxlanıldıqdan sonra beynəlxalq manşetlərə çıxmışdı. O, avqustun 28-də "Telegram" mesajlaşma tətbiqində iddia edilən qanunsuz fəaliyyətlərlə bağlı bir neçə cinayət maddəsi üzrə ittiham olunmuşdu. Lakin 5.5 milyon dollar girov ödəməklə həbsdən yayına bilmiş və Fransanı tərk etməmək, həmçinin həftədə iki dəfə polis bölməsinə müraciət etmək şərtiylə azadlığa buraxılmışdı.

Fransız prokurorlar Durovu "Telegram" tətbiqində narkotik alverinə və uşaqlara aid seksual xarakterli görüntülərin paylaşılmasına göz yummaqda, həmçinin tətbiqdəki qanunsuz fəaliyyətlərlə bağlı aparılan istintaqda tələb olunan sənədləri təqdim etməkdən imtina etməkdə günahlandırıblar.

Durov bu həbsi "əsassız" adlandırsa da, o vaxtdan bəri "Telegram" bu ittihamlarla bağlı qaldırılan məsələləri birbaşa hədəf alan müəyyən tədbirlər görüb.

Rusiya Baş Prokurorluğu 'Amnesty International' beynəlxalq insan haqları təşkilatını "arzuolunmaz" təşkilat elan edib.

Dövlət qurumu iddia edir ki, təşkilatın Londondakı mənzil-qərargahı Ukraynanın "himayədarları tərəfindən maliyyələşdirilən qlobal rusofob layihələrin hazırlanma mərkəzi"dir. Baş Prokurorluq hesab edir ki, 'Amnesty International'ın üzvləri "ekstremist" təşkilatları dəstəkləyir və "xarici agentlərin" fəaliyyətini maliyyələşdirir.

2025-ci ilin martında 'Amnesty International' illik hesabatını dərc edib. Həmin hesabatda bildirilib ki, Rusiya hakimiyyəti ukraynalı hərbi əsirləri və girov mülki şəxsləri işgəncələrə, xarici aləmlə əlaqəsiz şəkildə uzun müddət həbsdə saxlamağa, zorla yoxa çıxarma hallarına və digər qeyri-insani rəftarlara məruz qoyub. Hüquq müdafiəçiləri bildirirlər ki, belə rəftar hərbi cinayətlərə və insanlığa qarşı cinayətlərə bərabərdir.

'Amnesty International' 1961-ci ildə Böyük Britaniyada yaradılmış beynəlxalq qeyri-hökumət təşkilatıdır. Onun işi, internet səhifəsində qeyd edildiyi kimi, insan hüquqları problemlərinin yerlərdə araşdırılması və təhlili, beynəlxalq həmrəylik kampaniyaları və insan hüquqlarının inkişafı üçün hökumətlər və vətəndaş cəmiyyəti ilə qarşılıqlı əməkdaşlıqdan ibarətdir.

"Amnesty"nin Rusiyaya cavabı: Səylərimizi ikiqat artıracağıq

"Amnesty International" Moskvanın təşkilatı "arzuolunmaz" elan etməsindən sonra Rusiyada insan haqları pozuntularını ifşa etmək üçün səylərini ikiqat artıracağına söz verib.

"Əgər hakimiyyət orqanları bizim təşkilatımızı "arzuolunmaz" elan etməklə insan haqları pozuntularını sənədləşdirmək və ifşa etmək işimizi dayandıracağımızı düşünürlərsə, dərindən yanılırlar – əksinə", - "Amnesty International"ın baş katibi Anyes Kallamar açıqlamasında bildirib.

"Biz təhdidlərə boyun əyməyəcəyik və Rusiyada insanların ayrıseçkilik olmadan insan haqlarından istifadə edə bilmələrini təmin etmək üçün əzmkar şəkildə fəaliyyətimizi davam etdirəcəyik. Ukraynada Rusiya tərəfindən törədilən müharibə cinayətlərini sənədləşdirməyə və dünya miqyasında bunu açıqlamağa davam edəcəyik. Həm ölkə daxilində, həm də xaricdə Rusiyanın açıq-aydın insan haqları pozuntularını ifşa etmək üçün səylərimizi ikiqat artıracağıq".

"Arzuolunmaz təşkilat" qanunu Rusiyada 2015-ci ildə qəbul olunub və xarici mənbələrdən maliyyə dəstəyi alan təşkilatları hədəf alır.

Rusiya siyahıdakı təşkilatların ölkənin milli təhlükəsizliyinə təhdid olduğunu iddia edir. Bununla belə, ekspertlər bunun sadəcə Rusiya hakimiyyətinin Kremlin fikirlərinə uyğun gəlməyən səsləri boğmaq cəhdi olduğunu deyir.

2024-cü ildə AzadlıqRadiosu da Rusiyada "arzuolunmaz"lar siyahısına salınıb.

Rusiya vətəndaşlarını "arzuolunmaz" təşkilatlarla əməkdaşlıq etdiklərinə və ya onların Rusiya daxilində maliyyələşdirilməsinə kömək etdiklərinə görə 5 ilə qədər həbs cəzası gözləyir.

Rusiya artıq üç ildir "Amnesty International"ın saytlarına girişi bloklayıb və Moskva ofisini qeydiyyatdan çıxarıb.

Rusiya xarici işlər naziri Sergey Lavrov mayın 20-21-də Ermənistanda işgüzar səfərdə olacaq. Rusiya Xarici İşlər Nazirliyinin (XİN) məlumatına görə, o, ermənistanlı həmkarı Ararat Mirzoyan, baş nazir Nikol Paşinyan və prezident Vahaqn Xaçaturyanla görüşlər keçirəcək.

"Tərəflər regional təhlükəsizlik məsələləri, xüsusilə Ermənistan-Azərbaycan və Ermənistan-Türkiyə nizamlanması üzrə ətraflı fikir mübadiləsi aparacaqlar", - Rusiya XİN-in məlumatında bildirilib.

Xatırlatma

Ötən əsrin 90-cı illərinin əvvəllərində Qarabağ münaqişəsi Azərbaycan və Ermənistan arasında toqquşmalar doğurmuş, Azərbaycanın Qarabağ bölgəsi və ətrafındakı 7 rayon işğal edilmişdi. 2020-ci il 44 günlük müharibə və 2023-cü ilin sentyabrında Qarabağdakı birgünlük hərbi əməliyyatlardan sonra Azərbaycan ərazi bütövlüyünü bərpa edib. Azərbaycan birgünlük əməliyyatı "antiterror tədbirləri", Yerevan isə "etnik təmizləmə" adlandırıb. Həmin əməliyyatdan sonra bölgənin erməni əhalisi Ermənistana köç edib.

Bakı və Yerevan sülh sazişi imzalamayıb. Danışıqlar Vaşinqton, Avropa İttifaqı və Rusiyanın vasitəçiliyi ilə davam etdirilib.

Mayın 6-dan bəri yaxınlarının barəsində məlumatları olmadıqlarını söylədikləri "İşçi Masası" Həmkarlar İttifaqları Konfederasiyası üzvü Elvin Mustafayevin 6 saylı Cəzaçəkmə Müəssisəsinə köçürüldüyü bildirilir.

Bu barədə mayın 19-da onun yaxınları məlumat veriblər.

Əvvəllər 13 saylı Cəzaçəkmə Müəssisəsində saxlanılan Mustafayev həmin gün – mayın 6-da siyasi məhbuslara dəstək məqsədilə aclıq aksiyasına başladığını açıqlamışdı.

Bildirdiyinə görə, bundan sonra ondan hər hansı xəbər almaq mümkün olmayıb.

Yaxınlarının vurğulamalarına görə, iki həftəyə yaxın bir müddətdən sonra E.Mustafayevin 6 saylı Cəzaçəkmə Müəssisəsinə köçürüldüyünü və orada cərimə təcridxanasına (kars) salındığını öyrəniblər.

Hələlik, bu məlumata Penitensiar Xidmətdən münasibət almaq mümkün olmayıb.

15 may

Yaxınları Elvin Mustafayevin taleyindən narahatdırlar

Yaxınları "İşçi Masası" Həmkarlar İttifaqları Konfederasiyasının həbsdə olan üzvü Elvin Mustafayevdən bir həftədən çoxdur xəbər ala bilmir.

Bu barədə mayın 14-də "İşçi Masası" məlumat yayıb.

Bildirilir ki, Mustafayev saxlanıldığı 13 saylı Cəzaçəkmə Müəssisəsində məhbusların hüquqlarının pozulmasına, həmçinin siyasi məhbusların azad edilməməsinə görə mayın 6-da aclıq aksiyasına başlayıb: "Bundan sonra ona təzyiqlər edilib və saxlanıldığı yer dəyişdirilib, lakin hazırda hansı müəssisədə saxlanıldığından xəbər yoxdur".

Yaxınlarının onun səhhətindən narahat olduqları vurğulanır.

Bu məlumata, hələlik, Penitensiar Xidmət və başqa rəsmi qurumlardan münasibət almaq mümkün olmayıb.

E.Mustafayev 2023-cü ilin avqustunda narkotik maddələrin satışında ittiham olunaraq saxlanılıb. 2024-cü il yanvarın 31-də Bakı Ağır Cinayətlər Məhkəməsi onu 3 il müddətinə azadlıqdan məhrum edib. Mustafayev ittihamı rədd edib və bunu onun "İşçi Masası"ndakı fəaliyyəti ilə əlaqələndirib: "Marketdən çıxanda dörd nəfər zorbalıqla mənə hücum etdi. Dərhal telefonumu götürdülər. Məni idarəyə gətirdilər. Dedilər ki, bunu boynuma götürməsəm, üzümə qadın qoyub, zorlama ilə ittiham edəcəklər. Yaxud "İran agenti" ittihamı ilə həbsə göndərəcəklər...".

2022-ci ildə yaradılan "İşçi Masası" Həmkarlar İttifaqları Konfederasiyasının dörd üzvü – sədr Afiəddin Məmmədov, üzvləri Ayxan İsrafilov, Elvin Mustafayev və Möhyəddin Orucov hazırda həbsdədir. Onlar müxtəlif ittihamlarla üzləşsələr də, ittihamların hamısını qurama, siyasi sayırlar.

Xatırlatma

Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında təxminən 350 siyasi məhbus var. Rəsmilər ölkədə siyasi motivli həbslərin olmadığını deyirlər. Onların vurğulamasına görə, siyasi məhbus siyahılarında yer alan şəxslər sırf törətdikləri əməllərlə bağlı mühakimə ediliblər. Amma beynəlxalq insan haqları qurumları, ABŞ Dövlət Departamenti, Bakıdakı bir qrup Qərb diplomatı hökuməti haqsız tutulanları azad etməyə, müstəqil mediaya, vətəndaş cəmiyyətinə basqıları dayandırmağa çağırıb.

Böyük Britaniyanın Tehrandakı müvəqqəti işlər vəkili İranın Xarici İşlər Nazirliyinə çağırılıb. Bu addım Londonun üç iranlını xarici casus agentliyinə Britaniya ərazisində fəaliyyət göstərməyə yardım etməkdə ittiham etməsindən sonra atılıb. Hadisə iki ölkə arasında münasibətlərin daha da pisləşdiyi bir vaxta təsadüf edir.

London sakinləri olan bu üç nəfər mayın 3-də həbs edilib və mayın 17-də onlara qarşı ittiham irəli sürülüb.

İran mediası mayın 19-da bildirib ki, Böyük Britaniya diplomatı həbslər və İran İslam Respublikasına qarşı irəli sürülən "əsassız" ittihamlarla bağlı izahat vermək üçün çağırılıb.

Britaniyanın terrorla mübarizə xidməti ötən həftəsonu 39 yaşlı Mustafa Sepahvənd, 44 yaşlı Fərhad Cavadi Maneş və 55 yaşlı Şapur Qalehali Xani Nurini 2024-cü ilin avqustun 14-dən 2025-ci ilin fevralın 16-na qədər "xarici kəşfiyyat xidmətinə kömək edə biləcək" davranışlarda ittiham edib.

Britaniya polisi sözügedən xarici kəşfiyyat xidmətinin İrana məxsus olduğunu bildirib.

İlkin məhkəmə zamanı prokurorlar iddia ediblər ki, bu üç şəxs İran hökumətini tənqid edən "Iran International" yayım şirkətinin Britaniyada yaşayan jurnalistlərini hədəf alıb.

Bu ittihamlar polisin mayın əvvəlində yeddi iranlı da daxil olmaqla səkkiz nəfəri iki ayrı əməliyyatda həbs etməsindən sonra gəlir.

Polis həmin əməliyyat çərçivəsində saxlanılanların sərbəst buraxıldığını, lakin istintaqın hələ da açıq qaldığını bəyan edib.

İrana səyahət edən britaniyalı cütlüyün fevral ayında casusluqda ittiham olunmasından sonra Tehran və London arasında münasibətlər pisləşib. Kreyq və Lindsi Foreman cütlüyünün İranda həbs olunduqları zaman motosikletlə dünya səyahətinə çıxdıqları bildirilir.

Britaniya mediası yazır ki, onlar dekabrın 30-da Ermənistandan İrana daxil olub və beş gündən sonra Pakistan sərhədi ilə ölkəni tərk etmək niyyətində olublar. Onlar Təbriz, Tehran və İsfahanda qalıblar.

Britaniya hazırda öz vətəndaşlarına heç bir halda İrana səfər etməməyi tövsiyə edir və həbs, sorğu-sual və ya saxlanma riskini əsas gətirir.

Beynəlxalq insan haqları qrupları İranı "girov diplomatiyası"nda, xarici və ikili vətəndaşları Qərblə münasibətlərdə təsir rıçaqları kimi istifadə etməkdə ittiham edir.

Polşanın Milli Gəlir İdarəsi (NRA) mayın 19-da bildirib ki, gömrük xidmətinin əməkdaşları Belarus vasitəsilə Rusiyaya gedən mülki "Boeing" təyyarələri üçün nəzərdə tutulmuş beş tonluq şin partiyasını ələ keçirib.

"Koroşində bir yük maşınına baxış zamanı əməkdaşlar müəyyən ediblər ki, sürücü bəyan edilmiş minik və avtobus şinləri əvəzinə "Boeing" mülki təyyarələrində istifadə olunan şinləri daşıyırmış", - NRA-nın açıqlamasında bildirilib.

Koroşin Polşanın şərq sərhədində yerləşir və Belarusun Brest şəhəri ilə qonşudur.

"Malların göndəricisi İspaniya şirkəti, alıcısı isə Azərbaycan şirkəti olub. Gömrük saxtakarlığı ilə bağlı cinayət işi başlanılıb. Sanksiyaya məruz qalmış mallar saxlanılıb", - idarə əlavə edib.

Prezident Vladimir Putinin Ukraynaya qarşı genişmiqyaslı işğal əmri verdiyi vaxtdan bəri Qərb ölkələri Rusiya əleyhinə bir neçə mərhələdə sanksiyalar tətbiq ediblər. Eləcə də, onlarla xarici şirkət Rusiya bazarını tərk edib.

Mediada yayılan məlumatlara görə, məhdudiyyətlərə baxmayaraq, Moskva bəzən hərbi məqsədlər üçün kritik əhəmiyyətli mallar və texnologiyalar əldə etməyə davam edir.

Seçkilərin Monitorinqi və Demokratiyanın Tədrisi Mərkəzinin (SMDTM) rəhbəri Anar Məmmədlinin cinayət işi üzrə istintaq yekunlaşıb, iş baxılıması üçün məhkəməyə göndərilib.

Bu barədə müdafiə tərəfi məlumat verib.

Məlumata görə, cinayət işi Bakı Ağır Cinayətlər Məhkəməsinin hakimi Aygün Qurbanovanın icraatına verilib və məhkəmənin hazırlıq iclası mayın 26-na təyin olunub.

A.Məmmədli ötən il aprelin 29-da saxlanıb. Aprelin 30-da Xətai rayon Məhkəməsi onun barəsində həbs-qətimkan tədbiri seçib. A.Məmmədli Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham olunur. O, ittihamı qəbul etmir.

SMDT rəhbəri A.Məmmədli bundan əvvəl 2013-cü ilin sonlarında saxlanmışdı. O, həmin vaxt vergidən yayınma və başqa ittihamlar ilə 5 il 6 ay müddətinə həbs edilmişdi. Amma onda da ittihamları qəbul etməyib. Bir sıra yerli və beynəlxalq təşkilatlar onu siyasi məhbus kimi tanıyıblar. Məmmədli 2016-cı il martın 17-də əfv sərəncamı ilə azadlığa buraxılmışdı.

Qaçaqmalçılıq…

Ümumilikdə 2023-cü ilin noyabrından başlayaraq Azərbaycanda qruplar halında 30-dan çox jurnalist, ictimai fəal qaçaqmalçılıq ittihamı ilə həbs edilib. Sonra onların bəzilərinin ittihamı daha bir neçə maddə ilə ağırlaşdırılıb. Söhbət külli miqdarda gəlir əldə etməklə qanunsuz sahibkarlıqdan, habelə mütəşəkkil dəstə ilə qaçaqmalçılıqdan, vergidən yayınmaqdan, sənəd saxtalaşdırma və saxta sənədlərdən istifadədən gedir. Amma onların hamısı ittihamla razılaşmır, bunu peşə fəaliyyətləri və siyasi sifariş ilə izah edirlər.

Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında təqribən 350 siyasi məhbus var. Rəsmilər isə, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslar ilə həbs edilmir.

Rusiya Baltik dənizindəki ərazi sularında "Green Admire" neft tankerini saxlayıb. Estoniya Xarici İşlər Nazirliyi məlumat yayıb ki, həmin gəmi Estoniyanın Sillаmyaye limanını tərk edərək razılaşdırılmış marşrut üzrə hərəkət edirmiş.

Liberiya bayrağı altında üzən tanker Yunanıstanın "Aegean Shipping" şirkətinə məxsusdur. O, mayın 17-də axşam Sillаmyayeni tərk edib və gecə yarısından sonra rusiyalılar tərəfindən dayandırılıb. Bu barədə Estoniyanın ERR telekanalı məlumat yayıb.

Daha sonra gəmi Qoqland adasına doğru hərəkət edib və orada lövbər salıb. Şist yağı daşıyan tankerin son təyinat məntəqəsi — Rotterdamdır. Gəmilərin hərəkətini monitorinq edən "Marinetraffic" xidməti sözügedən tankerin hazırda Hoqland yaxınlığında olduğunu təsdiqləyir.

Estoniya Xarici İşlər Nazirliyi bəyan edib ki, tankerin marşrutu təhlükəsizlik məqsədlərinə uyğun seçilmiş və Rusiya, Estoniya və Finlandiya arasında olan razılaşma çərçivəsində təsdiqlənmişdi. Belə halların qarşısını almaq üçün Estoniya Sillаmyaye limanına hərəkəti yalnız öz ərazi suları vasitəsilə yönəltmək niyyətindədir.

Estoniyanın xarici işlər naziri Marqus Tsahkna mayın 18-də X hesabında bildirib ki, "Rusiya özünü hələ də proqnozlaşdırıla bilməyən şəkildə aparır".

Mayın 14-də Estoniya Hərbi Dəniz Qüvvələri Rusiyanın "kölgə donanması" ilə əlaqədə şübhəli bilinən "Jaguar" tankerini Baltik dənizinin beynəlxalq sularda dayandırmağa cəhd edib. Gəmi əmrə tabe olmayıb. Estoniya tankeri saxlamaq üçün helikopter, təyyarə və dəniz patrul katerindən istifadə edib. Buna cavab olaraq Rusiya qırıcısını göndərib, o, NATO hava məkanına daxil olub və tankeri Leninqrad vilayətindəki Primorsk limanına müşayiət edib.

ABŞ-nin keçmiş prezidenti Co Baydenə prostat xərçənginin "aqressiv forması" diaqnozu qoyulub və o, ailəsi ilə müalicə variantlarını nəzərdən keçirir. Mayın 18-də eks-prezidentin ofisi bu barədə məlumat yayıb.

Ofisin yaydığı açıqlamada bildirilib ki, mayın 16-da Baydenə bu diaqnoz qoyulub.

"Keçən həftə prezident Co Bayden sidik ifrazında artan simptomlarla üzləşdikdən sonra prostat vəzində yenidən aşkarlanan düyünlə bağlı müayinədən keçib. Cümə günü ona prostat xərçəngi diaqnozu qoyulub – Qlison şkalasına görə 9 bal ilə qiymətləndirilən və sümüyə metastaz verən bir forma", – açıqlamada deyilir.

"Bu, xəstəliyin daha aqressiv bir formasını təmsil etsə də, xərçəngin hormonlara həssas olduğu görünür ki, bu da onun effektiv idarə olunmasına imkan verir", – prezidentin ofisi əlavə edib.

Prezident Barak Obamanın dövründə səkkiz il vitse-prezident vəzifəsində çalışmış və 2020-ci ildə prezident seçkilərində Donald Trampı məğlub edən Bayden seçki kampaniyası zamanı Trampa qarşı zəif müzakirələr - yaddaş itkisi ilə bağlı tənqidlərə görə yenidən seçilməkdən imtina edib və namizədliyini geri götürüb.

Onun prezidentlik müddəti yanvarın 20-də başa çatıb, Tramp Kamala Harris üzərində qələbə qazandıqdan sonra vəzifəyə başlayıb. Harris prezident Baydenin vitse-prezidenti olub.

Baydenə qarşı tez-tez şəxsi təhqirlər səsləndirən Tramp mayın 18-də bildirib ki, o və Birinci xanım Melaniya "Co Baydenin son tibbi diaqnozu ilə bağlı xəbərdən kədərləniblər".

"Co döyüşçüdür və onun bu çətinliklə həmişəki gücü, dözümlülüyü və nikbinliyi ilə üzləşəcəyini bilirəm. Bunlar onun həyatını və liderliyini daim səciyyələndirən xüsusiyyətlər olub", - Harris yazıb.

Obama isə yazıb: "Mişel və mən Bayden ailəsini düşünürük… Əminəm ki, Co bu çətinliyə özünəməxsus qətiyyət və ləyaqətlə sinə gərəcək".

AP-nin məlumatına görə, prostat xərçənginə Qlison şkalası verilir – bu şkala xərçəng hüceyrələrinin normal hüceyrələrlə müqayisədə necə göründüyünü ölçür və 1-dən 10-a qədər qiymətləndirilir. Baydenin 9 ballıq göstəricisi onun xərçənginin ən aqressiv formaya yaxın olduğunu göstərir.

Metastaz vermiş xərçəng müalicəsi daha çətin olan növdür, çünki dərmanların bütün şiş ocaqlarına çatması və xəstəliyi tamamilə aradan qaldırması çətin olur.

Bununla belə, Baydenin diaqnozunda olan xərçəng növü hormonların təsiri ilə böyüyür, bu da şişləri həmin hormonlardan məhrum edən müalicə üsullarına qarşı həssas ola biləcəyini göstərir.

Mayın 18-də Vatikanda Papa XIV Leonun taxta çıxma mərasimi keçirilib və o, rəsmən pontifik vəzifəsinin icrasına başlayıb.

267-ci Roma Papasının taxta çıxma mərasimində 150-dən çox ölkədən nümayəndə iştirak edib. Qonaqlar arasında ABŞ-nin vitse-prezidenti Ceyms Devid Vens, ABŞ dövlət katibi Marko Rubio, Ukrayna prezidenti Volodimir Zelenski və Peru prezidenti Dina Boluarte də olub. Yeni pontifik bir neçə onilliklər ərzində Peruda missioner və yepiskop kimi fəaliyyət göstərib.

Papa Fransiskin vəfatından sonra mayın 8-də 69 yaşlı amerikalı kardinal Robert Frensis Prevo yeni Papa seçilib. O, XIV Leo adını alıb. Bazar günü, mayın 11-də Müqəddəs Pyotr meydanında ilk dəfə çıxış edən Papa XIV Leo Ukraynada " həqiqi və davamlı" sülhə çağırış edib.

Mərasimdən sonra yeni Roma Papası Ukrayna prezidenti V.Zelenski ilə təkbətək görüşüb. Zelenski Rusiyanın Ukraynaya qarşı təxminən 39 aydır davam edən müharibəsində döyüşləri dayandırmağa kömək etmək üçün Roma Katolik Kilsəsinin rəhbərinə müraciət edib.

"Şəhid Ukrayna, nəhayət ki, ədalətli və davamlı sülh üçün danışıqların baş tutmasını gözləyir", - Leo mərasimdən sonra duada deyib.

"Biz Ukrayna və Rusiya arasında birbaşa danışıqlar platformasına çevrilməyə hazır olduğuna görə Vatikana təşəkkür edirik. Real nəticələr naminə istənilən formatda dialoqa hazırıq", - Zelenski görüşdən sonra bildirib.

Bu gün, mayın 16-da Prezident yanında Əfv Məsələləri Komissiyasının bu il üzrə yeddinci iclası keçirilib.

Komissiyadan ölkənin yerli saytlarına verilən məlumata görə, bu, 2025-ci il üzrə sonuncu iclas olub. Vurğulanıb ki, üç aydan çox davam edən toplantılarda ümumilikdə 800-dən çox müraciətə baxılıb. Amma müraciətlərin detalları açıqlanmır.

Baxılan müraciətlər yaxın zamanlarda prezidentə təqdim olunmalıdır. Mayın 28-i qeyd ediləcək Müstəqillik Günü ərəfəsində prezidentin növbəti əfv sərəncamı imzalayacağı gözlənir.

Sonuncu belə sərəncam ötən il mayın 25-də, Müstəqillik Günü ərəfəsində imzalanmışdı. Sərəncam 154 nəfərə şamil edilmişdi. Onlardan 63 nəfər azadlıqdan məhrumetmə cəzasından azad edilmiş, 52 şəxsin cəzasının çəkilməmiş hissəsi yarıyadək azaldılmışdı.

Hüquq müdafiəçiləri isə bildirmişdi ki, onların siyasi məhbus kimi tanıdıqları şəxslərin heç birinin adı həmin sərəncama düşməyib.

Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında 350 civarında siyasi məhbus var. Rəsmilər isə, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslar ilə həbs edilmir. Onların deməsinə görə, həmin siyahılarda yer alanlar sırf törətdikləri əmələ görə məsuliyyətə cəlb ediliblər.

Beynəlxalq insan haqları qurumları isə hökuməti haqsız tutulanları azad etməyə, müstəqil mediaya, vətəndaş cəmiyyətinə basqıları dayandırmağa çağırıb.

"BBC News"un Rusiya xidməti və "Mediazona"nın jurnalistlərdən və könüllülərdən ibarət komandası Ukraynada genişmiqyaslı müharibədə həlak olan 108 min 608 Rusiya hərbçisinin adını müəyyənləşdirib.

Siyahıda 10 general, 524 polkovnik və polkovnik-leytenant olmaqla 5 mindən çox zabitin adı var.

Araşdırmaya görə, ölümü təsdiqlənmiş hər dörd hərbçidən biri müharibə başladıqdan sonra Rusiya ordusunda xidmət üçün müqavilə imzalayanlardır.