Ermənistan Təhlükəsizlik Şurasının katibi Armen Qriqoryan Rusiyanı Qarabağı Azərbaycana verməkdə ittiham edib.

Qriqoryan bildirib ki, Rusiyanın icazəsi olmadan 2020-ci ildə 44 günlük müharibə olmazdı.

"Bu, Rusiyadan tamamilə asılı olduğumuz vaxt baş verdi. Rusiya gəldi, Dağlıq Qarabağı əlimizdən aldı, Azərbaycana qaytardı, sonra getdi, bütün reallıq budur. Mən iddia edirəm ki, Dağlıq Qarabağı Rusiya tutub. Rusiyanın icazəsi olmadan müharibə olmazdı", - o, jurnalistlərlə brifinqdə deyib.

Qriqoryan vurğulayıb ki, Ermənistanın Rusiyadan asılılığı müharibəyə gətirib çıxarıb və siyasi kursun dəyişməsi sabitliyə çevriləcək: "Ermənistan tamamilə Rusiyadan asılı olanda bizdə müharibə yox idi? Var idi. Gəlin dəqiqləşdirək: bu mövcud vəziyyətə görə biz özümüzü müharibəyə saldıq".

Rusiya Federasiya Şurasının Beynəlxalq əlaqələr komitəsinin rəhbəri Qriqori Karasin isə "RİA Novosti"yə bildirib ki, Qriqoryanın həmin bəyanatı doğru deyil: "Erməni siyasi xadimlərinin, o cümlədən ali rəhbərliyin yazı və çıxışlarına müraciət etmək lazımdır. Bu sualların cavabları artıq orada var".

+++

Ermənistan Təhlükəsizlik Şurasının katibi Armen Qriqoryanın Rusiyanı Qarabağı Azərbaycana verməkdə ittiham etməsinə Bakıdan da cavab verilib.

Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev deyib ki, bu açıqlama əvvəlki və indiki Ermənistan siyasi-hərbi rəhbərliyinin məğlubiyyətini ört-basdır etmək, günahı başqasının üzərinə yıxmaq və özünə bəraət qazanmaq cəhdindən başqa bir şey deyil.

AZƏRTAC-ın xəbərinə görə, Hacıyev vurğulayıb ki, "Azərbaycan ordusu döyüş meydanında öz sözünü deyərək Ermənistanın 30 il davam edən hərbi işğalına son qoyub və kapitulyasiya aktını imzalamağa məcbur edib".

"Bu kimi açıqlamalar Ermənistanın siyasi-hərbi rəhbərliyinin təfəkküründə hələ də revanşizm xülyalarının qalmasının təzahürüdür", - o əlavə edib.

21 iyun

Mirzoyan Tixanovskaya ilə görüşüb

İyunun 20-də Vilnüsə səfəri çərçivəsində Ermənistan xarici işlər naziri Ararat Mirzoyan Belarus müxalifətinin lideri Svetlana Tixanovskaya ilə görüşüb.

Görüşün təfərrüatları açıqlanmır.

"Lukaşenko rejiminə qarşı qətiyyətli mövqeyinə görə Ermənistana təşəkkür etdim, Ermənistanla demokratik qüvvələrimiz arasında sıx əməkdaşlığın davam etdiriləcəyinə ümidimi bildirdim", - Tixanovskaya X-dəki mikrobloqunda yazıb.

14 iyun

'Politico' Belarusun Azərbaycana silah tədarükündən bəhs edir

Bakı Yerevanla müharibədə eskalasiyadan əvvəl Minskdən dronlar, artilleriya və radio-elektron mübarizə (REM) üçün yeni avadanlıqlar alıb.

"Politico" bunun məxfi sənədlərdə aşkar olunduğunu bildirir. Belarus və Ermənistan Kollektiv Təhlükəsizlik Müqaviləsi Təşkilatına (KTMT) daxildir.

"Politico" ondan çox məxfi məktub, diplomatik notlar, veksellər və ixrac pasportlarına istinadla yazır ki, Belarus Azərbaycana qabaqcıl silahlar verib.

Nəşrin məlumatına görə, 2018-ci ildən 2022-ci ilə qədər Minskdən Azərbaycan ordusuna yardım göstərilib. Xidmətlərə köhnə artilleriya avadanlıqlarının modernləşdirilməsi, REM və pilotsuz sistemlər üçün istifadə olunan yeni texnikanın tədarükünün daxil edildiyi bildirilir.

Araşdırılan sənədlər arasında Belarus Dövlət Silah İxracı Agentliyinin öz hərbi-sənaye firmalarına Bakı üçün müasir artilleriya avadanlıqlarının sifarişi ilə bağlı məktubları, habelə iki dövlət arasında Azərbaycan ordusuna "Qroza-S" pilotsuz uçuş aparatları ilə mübarizə stansiyalarının alınması ilə bağlı yazışmalar daxildir.

"Politico"nun əldə etdiyi sənədlərdən birində bildirilir ki, Belarus müəssisələri "Azərbaycanın işğaldan azad edilmiş ərazilərinin geri qaytarılmasında", həmçinin, Belarus mal və xidmətlərinin bu ölkəyə ixracında fəal rol oynayır.

Məqalədə bildirilir ki, kağız üzərində Aleksandr Lukaşenko Ermənistanın müttəfiqi olsa da, o, əvvəllər Azərbaycan prezidenti İlham Əliyevi "bizim adamımız" adlandırıb və KTMT-nin ona qarşı çıxmasının "səhv" olacağını deyib.

Əliyev isə, öz növbəsində, 2022-ci ildə bəyan edib ki, "KTMT-də dostumuz Ermənistanınkından daha çoxdur ".

Ekspertlərin fikrincə, Moskvanın ən yaxın müttəfiqlərindən biri olan Belarus Kremlin üstüörtülü dəstəyi olmadan hərəkət edə bilməzdi.

13 iyun

Kreml Ermənistanın KTMT-də qalacağına ümid edir

Rusiya Ermənistanın hələ də onun müttəfiqi olaraq qalacağına ümid edir.

Bunu iyunun 13-də Kremlin sözçüsü Dmitri Peskov Ermənistan baş naziri Nikol Paşinyanın ölkəsinin Kollektiv Təhlükəsizlik Müqaviləsi Təşkilatı (KTMT) ilə münasibətlərinə dair bugünlərdə verdiyi bəyanatları şərh edərkən deyib: "Biz erməni dostlarımızla işləməkdə davam edəcəyik. Biz mövqeyimizə aydınlıq gətirəcəyik. Əlbəttə, ümid edirik ki, bütün hallarda partnyorluq və müttəfiqliyimizə sadiq qalacağıq".

Paşinyanın KTMT bəyanatlarına Rusiya XİN də münasibət bildirib. Nazirliyin rəsmi nümayəndəsi Mariya Zaxarova Yerevanı KTMT üzvlüyü ilə bağlı "sonsuz" deyinməni dayandırmağa çağırıb: "Biz milyon dəfə demişik ki, KTMT hər bir kəsin könüllü qoşulduğu strukturdur. Burada iştirakçı ölkələrə təzyiq göstərilməsi üçün komanda və ya inzibati sistem yoxdur. Burada qarşılıqlı hörmətli dialoq var. Burda heç kim heç kimi güclə tutub saxlamayıb".

***

Ermənistanın Belarusdakı, Belarusun Ermənistandakı səfirləri məsləhətləşmələr üçün geri çağırılıb.

Paşinyan bir daha Belarusa getməyəcəyini bildirib

Ermənistan baş naziri Nikol Paşinyan bir daha Belarusa səfər etməyəcəyini bildirib.

Ermənistanın Kollektiv Təhlükəsizlik Müqaviləsi Təşkilatı (KTMT) ilə mürəkkəb münasibətlərindən danışan bu ölkənin baş naziri Belarus prezidentinin məlum qalmaqallı bəyanatını xatırladıb.

"KTMT ölkələrinin liderlərindən biri müharibənin hazırlanmasında iştirak etdiyini, Azərbaycanın qələbəsini ruhlandırdığını, inandığını və arzuladığını bildirir. Bundan sonra mən Belarus rəhbəri ilə KTMT formatında nəyisə müzakirə etməyə gedəcəm?", - deyən Paşinyan, bununla belə, Müstəqil Dövlətlər Birliyi (MDB) və Avrasiya İqtisadi Birliyi (AİB) çərçivəsində təmasları istisna etməyib.

"Bundan sonra bir daha Belarusa getməyəcəm. Nə qədər ki, Belarusda prezident Aleksandr Lukaşenkodur. Ümumiyyətlə, bəyan edirəm ki, bundan sonra Ermənistanın heç bir rəsmi nümayəndəsi Belarusa getməyəcək", - Paşinyan vurğulayıb.

O bildirib ki, KTMT çərçivəsində münasibətlərdə "məsələn, Belarus özü KTMT-dən çıxmaq qərarına gələrsə və ya Lukaşenko erməni xalqı üçün məqbul qaydada üzrxahlıq etsə, nəzəri olaraq dəyişiklikləri istisna etmək olmaz".

Paşinyanın KTMT ilə bağlı sözlərinin səhv anlaşıldığı bildirilir

Ermənistan baş naziri Nikol Paşinyanın ölkənin Kollektiv Təhlükəsizlik Müqaviləsi Təşkilatından (KTMT) çıxması ilə bağlı sözləri səhv anlaşılıb. Bunu ölkənin xarici işlər naziri Ararat Mirzoyan deyib.

"Əgər kimsə iddia edirsə ki, baş nazir Ermənistanın KTMT-dən çıxdığını deyib, o yanılır", - Mirzoyan Milli Assambleyada çıxışı zamanı deyib.

Onun sözlərinə görə, Paşinyan bildirib ki, Yerevan təşkilatdan nə vaxt çıxacağına qərar verəcək və sonra geri qayıtmayacaq: "Bu deyilib, nə az, nə çox".

Söhbət Paşinyanın iyunun 12-də parlamentdə hökumət saatı zamanı KTMT ilə bağlı dediyi sözlərdən gedir. "Çıxacağıq. Nə vaxt çıxacağımıza qərar verəcəyik. Bəs sizcə, növbəti addım nə olmalıdır?", - baş nazir bildirib.

O, KTMT-ni "köpük ittifaqı" adlandırıb. Deyib ki, onun üzvləri Azərbaycanla birlikdə Ermənistana qarşı müharibə planlaşdırıb.

Paşinyan onu da əlavə edib ki, Yerevan təşkilatdan çıxanda geri qayıtmayacaq: "Başqa yol yoxdur".

5 iyun

Yerevan Moskva ilə təmaslardan qaçır

"Ermənistan xarici işlər və müdafiə nazirlikləri xətti ilə Rusiya ilə təmaslara maraq göstərmir. Bu da Qərbin təzyiqinin nəticəsidir". Bunu TASS-a müsahibəsində Rusiya xarici işlər nazirinin müavini Mixail Qaluzin bildirib.

"2023-cü ilin noyabrından bəri xarici işlər nazirlərinin görüşü olmayıb. Xarici işlər nazirlikləri arasında məsləhətləşmələr üçün başqa planın işlənib hazırlanması və yekunlaşdırılması təklifimizə tərəfdaşlar maraq göstərmədilər. Müdafiə nazirlikləri arasında əlaqələrin dinamikasının nəzərəçarpacaq dərəcədə azalması bizim günahımız deyil. Hərbi-texniki əməkdaşlıq da geriləyib. Biz bunu Yerevanı ölkəmiz ilə əlaqələri minimuma endirməyə məcbur etməyə çalışan qərbçilərin təzyiqinin nəticəsi kimi görürük", - nazir müavini qeyd edib.

Bununla belə, o, ümidvar olduğunu bildirib ki, Ermənistan hakimiyyəti problemli məqamların aradan qaldırılması istiqamətində işləmək barədə açıq səsləndirdiyi niyyətini əməldə sübut edəcək: "Biz buna hazırıq".

Eyni zamanda, M.Qaluzin Moskva ilə Yerevan arasında ikitərəfli təmasların kəsilmədiyinə işarə edib: "Bu yaxınlarda, mayın 8-də Ali Avrasiya İqtisadi Şurasının növbəti iclası çərçivəsində Rusiya prezidenti Vladimir Putin ilə Ermənistan baş naziri Nikol Paşinyan arasında ətraflı söhbət olub. Rusiya hökumətinin sədri Mixail Mişustin fevralda erməni həmkarı ilə görüşüb".

Paşinyan: 'Ən azı iki KTMT ölkəsi bizə qarşı müharibədə iştirak edib'

Mayın 22-də parlamentdə hökumət saatında Ermənistan baş naziri Nikol Paşinyan Belarus liderinin bugünlərdə Bakıda verdiyi bəyanatı şərh edib.

Lukaşenko Azərbaycanda səfərdə olarkən Əliyevə deyib: "Mən bir daha düşündüm və müharibədən əvvəl, Sizin azadlıq müharibənizdən öncə söhbətimizi xatırladım. Həmin vaxt biz nahar süfrəsi arxasında ikilikdə fəlsəfi fikir yürüdürdük və belə nəticəyə gəldik ki, müharibədə qələbə çalmaq olar".

Paşinyan vurğulayıb ki, Azərbaycan prezidenti ilə görüşdə Belarus prezidenti onun dörd ildir Ermənistana demək istədiyini deyib: "2020-ci ildə 44 günlük müharibəyə hazırlıqda biz yox, müttəfiqlərimiz iştirak edib. Mən Kollektiv Təhlükəsizlik Müqaviləsi Təşkilatına (KTMT) üzv olan ən azı iki ölkəni tanıyıram ki, bizə qarşı müharibənin hazırlanmasında iştirak edib. Bu ölkələr bizə kömək etmək istədiklərini təqlid edirdilər. Amma o müharibə Dağlıq Qarabağla bağlı deyildi. Onlar Dağlıq Qarabağ məsələsini çoxdan özləri üçün bağlayıblar. Həmin müharibə Ermənistana aid gözləntilərin doğrulmaması ilə bağlı idi. Müharibənin məqsədi müstəqil Ermənistan dövlətinin mövcudluğuna son qoymaq idi. 9 noyabr 2020-ci il və sonrasında bu gözlənti özünü doğrultmadı".

Paşinyan 2021-ci ilin mayında, 2022-ci ilin sentyabrında və 2023-cü ilin sentyabrında oxşar cəhdlərin edildiyini, lakin uğursuz nəticələndiyini vurğulayıb. "2024-cü il mayın 9-da bir daha cəhd etdilər, amma yenə alınmadı və alınmayacaq", - o sözlərinə əlavə edib.

Bundan əvvəl Paşinyan bildirmişdi ki, KTMT-ə etibar etmək olmaz. (Quruma Rusiya, Ermənistan, Belarus, Qazaxıstan, Qırğızıstan və Tacikistan daxildir) Onun iddiasına görə, KTMT 2021 və 2022-ci illərdə Azərbaycan Silahlı Qüvvələrinin Ermənistan sərhədlərini pozması zamanı cavab mexanizmlərindən istifadə etməyib. Təşkilatdan o zaman sərhədlərin delimitasiya edilməməsi ilə bağlı bəyanat səslənmişdi.

Azərbaycan rəsmiləri isə Ermənistan sərhədlərinin pozulmasını təsdiq etməmişdi.

+++

Rusiya Xarici İşlər Nazirliyinin sözçüsü Mariya Zaxarova Ermənistan baş naziri Nikol Paşinyanın verdiyi son bəyanatında Kollektiv Təhlükəsizlik Müqaviləsi Təşkilatının (KTMT) hansı üzvlərini nəzərdə tutduğuna aydınlıq gətirməyə çağırıb: "Düzünü desəm, mənim üçün Ermənistan Baş nazirinin hansı ölkələrdən danışması maraqlıdır. Bunu biz özümüz təxmin etməliyik, yoxsa sonradan o, hansı ölkələri nəzərdə tutduğunu özü deyəcək? Düşünürəm ki, söhbət belə ciddi bəyanatlardan gedəndə həmin ölkələrin buna münasibət bildirməsi məntiqli olardı".

Zaxarovanın sözlərinə görə, Rusiya Ermənistanın özünü "atılmış və tərk edilmiş" kimi hiss etməməsi üçün mümkün olanı edib.

Xatırlatma

1990-cı illərin əvvəllərində Qarabağ münaqişəsi Azərbaycan və Ermənistan arasında toqquşmalara səbəb olmuşdu. Azərbaycanın Qarabağ bölgəsi, ətraf 7 rayonu işğal edilmişdi.

Azərbaycan 2020-ci ildə 44 günlük müharibə və 2023-cü ildə birgünlük əməliyyatla ərazilərinə nəzarəti bərpa edib.

Son illər iki ölkə arasında həm Avropa İttifaqı, həm də Rusiyanın ayrılıqda vasitəçiliyi ilə sülh danışıqları aparılır.

Hindistanla son qarşıdurma zamanı Türkiyə və Azərbaycanın Pakistana dəstək verməsindən sonra hindistanlılar bu ölkələrdəki istirahət məkanlarına planlaşdırılmış tətillərini ləğv edirlər.

Bu barədə "Reuters" Hindistandakı turizm rezervasiya şirkətlərinə istinadən bildirib.

Hindistan Pakistandakı "terror düşərgələri"nə zərbələr endirdikdən sonra ötən həftə Hindistan və Pakistan arasında şiddətli döyüşlər başlayıb. Lakin tərəflər mayın 10-da atəşkəs barədə razılığa gəldiklərini elan ediblər.

Hindistanlılar üçün məşhur və münasib büdcəli istirahət məkanları olan Türkiyə və Azərbaycan Hindistanın hava zərbələrindən sonra İslamabada dəstək ifadə edən bəyanatlar veriblər.

"Son bir həftə ərzində Azərbaycana və Türkiyəyə sifarişlər 60 faiz azalıb, eyni dövrdə ləğvlərin sayı isə 250 faiz artıb", - "'MakeMyTrip" onlayn rezervasiya şirkətinin sözçüsü bildirib.

'EaseMyTrip' şirkətinin baş icraçı direktoru Rikant Pitti isə deyib ki, son geosiyasi gərginliklərə görə platforma üzərindən Türkiyə üzrə səyahət rezervasiyalarının ləğvi 22 faiz, Azərbaycan üzrə isə 30% artıb.

O əlavə edib ki, hindistanlı turistlər indi Gürcüstan, Serbiya, Yunanıstan, Tailand və Vyetnama üstünlük verirlər.

Digər bilet satış platforması olan "ixigo" daha əvvəl X sosial şəbəkəsindəki paylaşımında Türkiyə, Azərbaycan və Çin üçün uçuş və otel sifarişlərini dayandıracağını bildirib.

"EaseMyTrip"in təsisçisi və idarə heyətinin sədri Nişant Pitti X platformasında paylaşımında yazıb ki, ötən il 287 min hindistanlı Türkiyəyə, 243 min nəfər isə Azərbaycana səfər edib.

"Bu xalqlar Pakistanı açıq şəkildə dəstəkləyirsə, biz onların turizmini və iqtisadiyyatlarını gücləndirməliyikmi?", - Pitti sual edib.

Avropa İttifaqı (Aİ) səfirləri mayın 14-də Rusiyanın Ukraynaya qarşı genişmiqyaslı işğal müharibəsi ilə əlaqədar bu ölkəyə qarşı 17-ci sanksiyalar paketini qəbul edib. AzadlıqRadiosunun jurnalisti Rikard Yozvyak bu barədə məlumat verib.

Həmçinin insan hüquqlarının pozulmasında, "hibrid əməliyyatlar" adlandırılan fəaliyyətlərdə və kimyəvi silahların yayılmaması rejiminin pozulmasında ittiham olunan Rusiya vətəndaşlarına qarşı sanksiyalar ayrıca təsdiqlənib.

Aİ xarici işlər nazirlərinin mayın 20-də sanksiyalara yekun təsdiq verəcəyi gözlənilir.

Sanksiya siyahısı hələ dərc edilməyib. KİV-in məlumatına görə, siyahıya onlarla hüquqi və fiziki şəxs, həmçinin Rusiyanın "kölgə donanması"na aid tankerlər daxil olacaq. Bu paketdə sektoral sanksiyalarının genişləndirilməsindən söhbət getmir.

Avropa Komissiyasının prezidenti Ursula Fon der Lyayen növbəti sanksiyalar paketinin qəbul olunması ilə bağlı razılaşmanı alqışlayıb. Onun sözlərinə görə, yeni sanksiyalar paketi Rusiya üçün "döyüş meydanında istifadə edilən texnologiyalara çıxışı daha da məhdudlaşdırır".

"Biz həmçinin Rusiyanın enerji ixracatını hədəf almaq üçün "kölgə donanması"nın əlavə 189 gəmisini siyahıya salmışıq. Bu müharibə bitməlidir. Kreml üzərində təzyiqi yüksək səviyyədə saxlamağa davam edəcəyik", - Avropa Komissiyasının prezidenti mayın 14-də X platformasındakı paylaşımında bildirib.

ABŞ prezidenti Donald Tramp Suriyaya qarşı sanksiyaların qaldırılmasına göstəriş verəcəyini bildirib.

Səudiyyə Ərəbistanında investisiya forumunda çıxış edən ABŞ prezidenti "Mən Suriyaya qarşı sanksiyaların dayandırılması barədə göstəriş verəcəyəm ki, onlara yenidən böyümək üçün bir şans verilsin" deyə bildirib.

O, müvafiq qərarı Səudiyyə Ərəbistanının vəliəhd şahzadəsi Məhəmməd bin Salman və Türkiyə prezidenti Rəcəb Tayyib Ərdoğanla vəziyyəti müzakirə etdikdən sonra verdiyini açıqlayıb.

Türkiyənin dövlət xəbər agentliyi "Anadolu" məlumat yayıb ki, Ərdoğan Ər-Riyadda Tramp, Məhəmməd bin Salman və Suriya prezidenti Əhməd əş-Şaraanın bir araya gəldiyi görüşə onlayn qatılıb.

Prezident Tramp sanksiyaların dəqiq nə vaxt götürüləcəyini açıqlamayıb. O əlavə edib ki, "bu həftə" ABŞ dövlət katibi Marko Rubio ilə Suriyanın xarici işlər naziri Əsəd əş-Şeybani arasında görüş keçiriləcək.

Dəməşq Trampın sanksiyaların ləğvi ilə bağlı açıqlamasını alqışlayıb. "Bu sanksiyalar daha əvvəl keçmiş diktator Əsəd rejiminə qarşı tətbiq olunsa da və onun süqutuna töhfə versə də, hazırda onlar birbaşa Suriya xalqına təsir göstərir və müharibədən sonrakı bərpa və yenidənqurma prosesinə mane olur", – əş-Şeybani dövlət agentliyi SANA-ya verdiyi müsahibədə bildirib.

ABŞ sanksiyalarının tezliklə ləğvi xəbəri Suriyada sevinclə qarşılanıb. DPA agentliyi xəbər verib ki, Dəməşq, Homs və digər şəhərlərdə suriyalılar kütləvi şəkildə meydanlara çıxıblar.

"The Times" daha əvvəl yazıb ki, Suriya lideri əş-Şaraa Trampa Vaşinqtonun Kiyevlə imzaladığı sazişə bənzər, təbii resurslarla bağlı bir saziş təklif edib. Nəşrin mənbələri bildirib ki, Suriyanın paytaxtında "Tramp Tower"in tikintisi ideyası da müzakirə olunub.

Suriyada Bəşər Əsəd rejimi 2024-cü ilin dekabrında devrilib və keçmiş prezident Rusiyaya qaçıb. Əsəd devrildikdən sonra Əhməd əş-Şaraa Suriyanın keçid prezidenti olub.

Rusiya Dövlət Duması ölkədən kənarda baş versə də, ölkənin maraqlarına qarşı yönələn qanun pozuntularına görə şəxslərin qiyabi olaraq inzibati məsuliyyətə cəlb olunmasını nəzərdə tutan qanun layihəsini birinci oxunuşda qəbul edib. Qanun layihəsinə görə, məsuliyyətə yalnız rusiyalılar deyil, həm də xarici vətəndaşlar cəlb oluna bilər.

2024-cü ilin oktyabrında təqdim edilən qanun layihəsi xaricdə yaşayan rusiyalıların "Rusiya Federasiyasının maraqlarına zidd" sayıla biləcək hərəkətlərə görə cəzalandırılmasını və onların iştirakı olmadan əmlaklarına həbs qoyulmasını təklif edir.

"OVD-İnfo" ilə əməkdaşlıq edən hüquq müdafiəçisi və vəkil Valeriya Vetoşkina "Current Time"a müsahibəsində deyib ki, fikir və mövqe ifadəsinə görə tətbiq olunan inzibati maddələrdə, ümumiyyətlə, əmlaka həbs qoyulması kimi bir müddəa mövcud deyildi. Bundan əlavə, bu cəza artıq mövcud olan cəza tədbirləri ilə müqayisədə qeyri-mütənasibdir.

Qanun layihəsi ilk dəfə 2024-cü ilin oktyabrında Tatarıstan Dövlət Şurası və deputat Ayrat Farraxov tərəfindən müzakirəyə təqdim ediləndə onun tətbiq olunacağı inzibati maddələrin siyahısı göstərilmişdi. RBK xəbər verir ki, qanun layihəsi konkret siyahı olmadan qəbul edilib. Dövlət Dumasının spikeri Vyaçeslav Volodin mayın 11-də Teleqram kanalındakı paylaşımında yazıb ki, söhbət ordunu gözdən salmaq, saxta məlumat yaymaq və söz azadlığından sui-istifadə etmək də daxil olmaqla, "bütün növ" inzibati maddələrlə məsuliyyətə cəlb olunmaqdan gedir.

Səudiyyə Ərəbistanının vəliəhdi Məhəmməd bin Salman və ABŞ prezidenti Donald Tramp silah tədarükü ilə bağlı böyük saziş imzalayıblar. Bu, mayın 13-də Amerika liderinin Ər-Riyada səfəri çərçivəsində baş tutub.

Sənəddə göstərilir ki, ABŞ Səudiyyə Ərəbistanına 142 milyard dollar dəyərində silah paketi satmağa razıdır. Ağ evin açıqlamasında razılaşma müdafiə sahəsində Vaşinqtonun indiyə qədər imzaladığı "ən böyük əməkdaşlıq sazişi" adlandırılır.

"Reuters"in vurğulamasına görə, saziş havadan və raketdən müdafiə, hərbi-hava qüvvələri, kosmik inkişaf, dəniz təhlükəsizliyi və rabitə kimi sahələrdə ondan çox Amerika hərbi şirkətini əhatə edir.

"Təsdiq olunmuş paket ikitərəfli tərəfdaşlığımızı gücləndirmək öhdəliyimizin bariz nümayişidir", - Tramp administrasiyasından bildirilib.

Səudiyyə Ərəbistanı Amerika silahlarının ən böyük alıcısıdır. "Reuters" yazır ki, əvvəlki prezident Co Baydenin administrasiyası Krallığın İsraillə münasibətlərinin normallaşdırılmasını nəzərdə tutan geniş sövdələşmə çərçivəsində Ər-Riyadla müdafiə paktı bağlamağa cəhd göstərsə də, uğursuz olub.

D.Tramp hazırkı səfəri zamanı şahzadə Məhəmməd bin Salmanı "inanılmaz insan" adlandırıb və əlavə edib ki, iki ölkə arasındakı bağ indi "həmişəkindən daha güclüdür". Səfərdə onu böyük iş adamları, o cümlədən "SpaceX" və "Tesla"nın rəhbəri İlon Mask müşayiət edir.

Trampın dördgünlük Yaxın Şərq turnesinin rəsmi proqramına Qətər və Birləşmiş Ərəb Əmirliklərinə səfərlər də daxildir.

Böyük Britaniya mayın 9-da Rusiyaya qarşı yeni sanksiyalar paketini elan edib. Britaniyanın yeni sanksiyaları Rusiyanın "kölgə donanması"nın 100-ə yaxın neft tankerini hədəf alıb. Bu sanksiyalar paketi çərçivəsində həmçinin "2Rivers Group" kimi tanınan neft ticarəti şirkəti "Coral Energy Group"un azərbaycanlı bir neçə direktorunun aktivləri də dondurulub.

Britaniya hökuməti sanksiyalar haqqında açıqladığı bildirişdə Əhməd Kərimov, Tahir Qarayev, Anar Mədətli, Tələt Səfərov və Etibar Eyyubun adları çəkilib və bildirilib ki, onlar "Coral Energy Group"un direktorları kimi fəaliyyət göstərərək "Rusiya hökumətindən fayda əldə etməkdə və ya onu dəstəkləməkdə iştirak ediblər".

"Coral Energy Group"un idarəçiliyi 2024-cü ildə T.Səfərov, Ə.Kərimov və A.Mədətli tərəfindən satın alınaraq "2Rivers Group" adı altında yenidən brend edilib.

"Coral Energy Group" 2010-cu ildə azərbaycanlı T.Qarayev tərəfindən təsis edilib. Şirkətin Dubay və Sinqapurda ofisləri olub.

Qeyd olunub ki, "Coral Energy Group" Rusiya hökuməti üçün strateji əhəmiyyət kəsb edən enerji sektorunda fəaliyyət göstərirdi.

Böyük Britaniya "2Rivers Group"a ilk dəfə 2024-cü ilin dekabrında sanksiyalar tətbiq edib.

Mayın 13-də Paris məhkəməsi fransız aktyor Jerar Depardyeyə 18 ay şərti həbs cəzası verib. Aktyor 2021-ci ildə film çəkilişi zamanı iki qadına qarşı seksual xarakterli qeyri-etik fiziki davranışda təqsirli bilinib. Belə ki, 76 yaşlı aktyor "Les Volets Verts" filminin çəkilişi zamanı 54 yaşlı səhnə quruluşçusuna və 34 yaşlı köməkçisinə toxunmaqda günahlandırılıb. O, ittihamları rədd edir.

"Le Figaro" xəbər verir ki, ittiham tərəfi həmçinin tələb edib ki, məhkəmə Depardyeni psixoloji yardım almağa, qurbanlara təzminat ödəməyə məcbur etməlidir. Eyni zamanda tələb olunub ki, aktyorun adı Fransanın seksual cinayətlər reyestrinə daxil edilməlidir.

Depardye ümumilikdə təxminən 20 qadına oxşar davranışda ittiham olunsa da, bu, aktyora qarşı məhkəməyə gətirilən ilk işdir. O, həmçinin aktrisa Şarlotta Arnuya təcavüzdə də ittiham olunur.

Fransa, Birləşmiş Ərəb Əmirlikləri və Rusiya vətəndaşlığı olan 76 yaşlı aktyor bugünkü məhkəmədə iştirak etməyib. Onun vəkili hökmdən apellyasiya şikayəti veriləcəyini bildirib. Depardyenin ifadəsində deyilirdi ki, onun davranışı çox vaxt "rus təbiəti"nə görə qəddar kimi qəbul edilir, lakin o, zorakılıq törətmək və ya başqalarına sataşmaq niyyətində olmayıb.

Mayın 12-də Birləşmiş Millətlər Təşkilatının (BMT) Aviasiya Şurası ümumilikdə 298 sərnişin və ekipaj üzvünün ölümünə səbəb olan Malayziyaya məxsus sərnişin təyyarəsinin Ukrayna səmasında vurulmasına görə Rusiyanın məsuliyyət daşıdığını müəyyən edib.

Beynəlxalq Mülki Aviasiya Təşkilatının (ICAO) Şurası 2014-cü il iyulun 17-də "Malayziya Hava Yolları"na məxsus MH17 reysinin vurulması ilə bağlı Rusiyanın beynəlxalq hava hüququ üzrə öhdəliklərini yerinə yetirmədiyini bildirib.

Şura Avstraliya və Niderlandın təyyarənin vurulması ilə bağlı Beynəlxalq Mülki Aviasiya Təşkilatına təqdim etdiyi iddiaların 'həm fakt, həm də hüquq baxımından əsaslandırılmış' olduğu qənaətinə gəlib

ICAO əlavə edib ki, şura öz tarixində ilk dəfədir ki, üzv dövlətlər arasında mübahisənin mahiyyəti üzrə qərar qəbul edib.

"Malayziya Hava Yolları"na məxsus MH17 reysi Amsterdamdan Kuala-Lumpura uçarkən Rusiyapərəst separatçılarla Ukrayna qüvvələri arasında döyüşlərin getdiyi vaxtda Ukraynanın şərqində raket ilə vurulub. Ölənlər arasında 196 Niderland vətəndaşı və 38 Avstraliya vətəndaşı olub.

Niderlandlı hakimlər 2022-ci ilin noyabrında iki rusiyalı və bir ukraynalını təyyarənin vurulmasında roluna görə qiyabi şəkildə təqsirli biliblər. Moskva bu hökmü "skandal" adlandırıb və vətəndaşlarını ekstradisiya etməyəcəyini bildirib.

Niderlandın xarici işlər naziri Kaspar Veldkamp deyib ki, "ICAO Şurasının səsverməsi MH17 reysinin bütün qurbanları, onların ailələri və yaxınları üçün həqiqətin bərqərar edilməsi və ədalətin əldə edilməsi istiqamətində əhəmiyyətli addımdır".

Veldkamp Niderland hökumətinin bəyanatında bildirib ki, bu qərar eyni zamanda beynəlxalq ictimaiyyətə aydın bir mesaj verir: dövlətlər beynəlxalq hüququ cəzasız şəkildə poza bilməzlər.

Avstraliyanın xarici işlər naziri Penni Vonq deyib ki, onun ölkəsi bu qərarı alqışlayır. Nazir sözügedən qərarı "həqiqət, ədalət və MH17 reysi qurbanları üçün məsuliyyətin təmin olunması yolunda tarixi bir an" adlandırıb və ICAO-nu tez bir zamanda kompensasiya mexanizmlərini müəyyən etməyə çağırıb.

"Qərarı qəbul edərkən ICAO Şurası silahların mülki təyyarələrə qarşı istifadə edilməməsi prinsipini dəstəkləyib", - nazir bildirib.

"Biz Rusiyanı bu dəhşətli zorakılıq aktına görə, nəhayət, öz məsuliyyəti ilə üzləşməyə və beynəlxalq hüquq çərçivəsində tələb olunduğu kimi kobud davranışına görə təzminat ödəməyə çağırırıq", - o əlavə edib.

Niderland hökuməti bəyanatında bildirib ki, ICAO yaxın həftələrdə hansı növ təzminatın uyğun olacağını nəzərdən keçirəcək.

XİN rəhbəri Veldkamp bildirib ki, Niderland və Avstraliya ICAO Şurasından Rusiyanı təzminatlarla bağlı danışıqlara başlamağa çağırmağı istəyir.

BMT-nin bir orqanı olan ICAO-nun 193 üzvü var. Bu beynəlxalq qurum ölkələrin Beynəlxalq Mülki Aviasiya Konvensiyasını pozub-pozmadığını müəyyən edir. Konvensiya üzv dövlətlərin mülki təyyarələrə qarşı silah istifadə etməkdən çəkinmələrini tələb edir.

Niderland hökumətinin bəyanatına görə, Şuranın böyük əksəriyyəti 12 mayda qəbul olunan qərarda Niderland və Avstraliyanın mövqeyini dəstəkləyib.

ABŞ prezidenti Donald Tramp mayın 12-də bildirib ki, onun danışıqlarda iştirakı faydalı olarsa, Rusiya və Ukrayna arasında İstanbulda keçiriləcək danışıqlarda iştirak edə bilər.

Prezident Tramp mayın 12-də ikinci prezidentlik müddətində ilk beynəlxalq səfərinə yola düşüb. Bu səfər proqramı çərçivəsində o, Səudiyyə Ərəbistanı, Qətər və Birləşmiş Ərəb Əmirliklərini ziyarət edəcək. ABŞ prezidentinin sözlərinə görə, o, mayın 15-də Rusiya və Kiyev nümayəndələri arasında danışıqların keçiriləcəyi İstanbula səfər etmək imkanını nəzərdən keçirir: "O anda harada olacağımı bilmirəm, Yaxın Şərqin hansısa bir yerində. Amma (mənim səfərimin) kömək edəcəyini düşünsəm, ora uçacağam".

Ukrayna prezidenti Volodimir Zelenski bu danışıqlarda iştirak edəcəyini açıqlayıb və rusiyalı həmkarı Vladimir Putini İstanbulda onunla görüşməyə çağırıb.

Prezident Trampın sözlərinə görə o, görüşdə Rusiya və Ukrayna prezidentlərinin iştirakını və 30 günlük atəşkəsə razılaşacaqlarını gözləyir.

"Məndə belə bir hiss var", - prezident jurnalistlərlə söhbəti zamanı deyib.

Mayın 10-da Kiyevdə keçirilən danışıqlardan sonra Böyük Britaniya, Almaniya, Fransa, Polşa və Ukrayna liderləri Rusiyadan 30 günlük atəşkəsə razılıq verməyi tələb ediblər. Avropa liderləri xəbərdarlıq edib ki, əgər Rusiya 12 maya qədər atəşi dayandırmaqdan imtina edərsə, onlar Rusiya iqtisadiyyatının bank və enerji sektorlarına qarşı daha sərt sanksiyalar tətbiq edəcəklər. Tramp administrasiyası bu xəbərdarlığa açıq şəkildə qoşulmayıb. Mayın 11-də prezident Tramp "Truth Social" sosial şəbəkəsində yazıb ki, bu danışıqlar, heç olmasa, razılaşma əldə etməyin mümkün olub-olmadığını müəyyən etməyə imkan verəcək: "Əgər bu mümkün deyilsə, Avropa liderləri və ABŞ vəziyyətin necə olduğunu biləcək və buna uyğun şəkildə hərəkət edəcəklər".

Hindistanın baş naziri Narendra Modi Pakistandakı "terror" infrastrukturunu hədəf alan "Sindur" ordu əməliyyatını dayandırdığını bəyan edib, o, Hindistanın İslamabadın bundan sonrakı hərəkətlərinə göz qoyacağını vurğulayıb.

"Pakistandan bizə müraciət olunanda əmin etdilər ki, onların tərəfindən bundan sonra terror fəaliyyəti və ya hərbi təcavüz olmayacaq", - o bildirib.

"Terrorçular Hindistanın belə ciddi addım ata biləcəyini hətta xəyallarında da düşünə bilməzdilər", - Modi sözlərinə əlavə edib.

Pakistan da Hindistanın hərəkətlərinə cavab olaraq başlatdığı "Banyan-ul-Marsus" əks-hücum əməliyyatının başa çatdığını elan edib. Bu barədə Pakistan ordusunun mətbuat xidməti bəyanat yayıb. "Hər dəfə suverenliyimiz təhlükə altına düşəndə cavabımız qətiyyətli və güclü olacaq", - "SamaaTV" bəyanatdan sitat gətirir.

Aprelin 22-də Hindistanın Cammu və Kəşmir bölgəsinin Pahalqam şəhərində terror aktı baş verib, 26 nəfər həlak olub. Hücuma görə məsuliyyəti "Müqavimət Cəbhəsi" (TRF) öz üzərinə götürüb, Yeni Dehli onu Pakistanda yerləşən "Laşkar-e-Tayba" terror təşkilatı ilə əlaqələndirir.

Bundan sonra Hindistan və Pakistan bir-birini hücumlarda günahlandıraraq sərhədyanı ərazilərə qarşılıqlı hücumlar edib. Mayın 7-nə keçən gecə Hindistan Pakistan ərazisindəki "terror" obyektlərini hədəf alan "Sindur" əməliyyatını elan edib, ölkənin Müdafiə Nazirliyinin məlumatına görə, terrorçularla əlaqəli doqquz obyektə raket zərbələri endirib.

Pakistan Hindistan ərazisini atəşə tutmaqla cavab verib. Pakistan ordusu həmçinin beş Hindistan qırıcısının məhv edildiyini açıqlayıb. Yeni Dehli bunu "yalan" adlandırıb. Mayın 10-na keçən gecə İslamabad genişmiqyaslı "Banyan ul-Marsus" əməliyyatını elan edib.

Həmin gün ABŞ prezidenti Donald Tramp Vaşinqtonun vasitəçiliyi ilə tərəflərin tam və dərhal atəşkəs barədə razılığa gəldiyini açıqlayıb. Tərəflər razılaşmanı təsdiqləyiblər. Hindistan xarici işlər naziri Vikram Misri dəqiqləşdirib ki, döyüşlər mayın 10-u yerli vaxtla saat 17:00-dan dayandırılmalıdır. Lakin sonradan Hindistan Pakistanı atəşkəsi pozmaqda ittiham edib. "The Indian Express"in yazdığına görə, Udhampur və Srinaqar şəhərləri hücuma məruz qalıb, Cammu və Kəşmir və Racastan ştatlarında dronlar görülüb. Xarici İşlər Nazirliyi hərbçilərin bu pozuntulara "adekvat" cavab verdiyini bəyan edib.

Pakistan atəşkəs rejiminin pozulması ilə bağlı ittihamları rədd edib. Xarici İşlər Nazirliyi əmin edib ki, İslamabad əvvəlki kimi razılaşmaya sadiqdir.

Cammu və Kəşmir

Cammu və Kəşmir Hindustan yarımadasının şimal-qərbində 1947-ci ildən Hindistan və Pakistan arasında mübahisə predmeti olan bir bölgədir. Hindistan və Pakistan üç dəfə-1947-1948, 1965 və 1971-ci illərdə Cammu və Kəşmir uğrunda müharibə aparıb. 2003-cü ildən ölkələr arasında qeyri-sabit atəşkəs rejimi qüvvədədir, lakin regionun statusu həll olunmayıb.

Cammu və Kəşmirin Hindistan hissəsində separatizm əhval-ruhiyyəsi güclüdür. 1980-ci illərin sonlarından bölgənin öz müqəddəratını özünün təyin etməsini və ya Pakistana birləşdirilməsini müdafiə edən üsyançı və terrorçu qruplaşmalar fəaliyyət göstərir. Yeni Dehli mütəmadi olaraq İslamabadı onlara maddi və maliyyə dəstəyi verməkdə ittiham edir. Əvvəlcə Hindistan (1974), sonra isə Pakistan (1998) nüvə silahı əldə etdikdən sonra Kəşmir münaqişəsinə diqqət artıb.

Mayın 12-də Ağ ev məlumat yayıb ki, ABŞ və Çin qarşılıqlı olaraq 90 gün müddətində gömrük rüsumlarının azaldılması barədə razılıq əldə edib. Ağ evin mətbuat açıqlamasında qeyd olunub ki, ABŞ və Çin hökumətləri ikitərəfli iqtisadi və ticarət münasibətlərinin əhəmiyyətini nəzərə alaraq, mayın 14-dən etibarən rüsumların azaldılmasına qərar veriblər.

ABŞ-nin maliyyə naziri Skott Bessent bildirib ki, hər iki ölkə qarşılıqlı rüsumları 115 faiz azaldacaq. Bununla da ABŞ tətbiq etdiyi rüsumları 145%-dən 30%-ə, Çin isə 125%-dən 10%-ə endirəcək.

Aprelin 2-də ABŞ prezidenti Donald Tramp, demək olar, bütün ölkələrdən idxal olunan mallara ticarət rüsumları tətbiq ediləcəyini elan edib. Aprelin 9-da isə o, bütün ölkələr üçün tariflərin tətbiqini müvəqqəti dayandırdığını və əsas rüsumu 10%-ə endirdiyini bəyan edib. Ancaq bu, yalnız Çinə aid edilməyib və bu ölkə üçün rüsumlar artırılıb. Pekin də Vaşinqtona cavab olaraq idxal tariflərini yüksəldib.

Tramp administrasiyasının addımlarına cavab olaraq Çin Ümumdünya Ticarət Təşkilatına (ÜTT) bəyanat göndərib və bu bəyanatda qlobal ticarətin sabitliyinə təhlükə yarandığı qeyd olunub.

Ağ evin yaydığı məlumatda deyilir ki, tərəflər iqtisadi və ticarət əlaqələri ilə bağlı müzakirələri davam etdirmək üçün mexanizm yaradacaqlar: "Bu müzakirələrdə Çin tərəfdən nümayəndə Dövlət Şurasının rəhbərinin müavini He Lifen, ABŞ tərəfdən isə maliyyə naziri katibi Skott Bessent və ABŞ-nin ticarət nümayəndəsi Ceymison Qrir olacaq. Bu müzakirələr növbə ilə Çin və ABŞ-də və ya tərəflərin razılığı ilə üçüncü ölkədə aparıla bilər".

Vurğulanıb ki, tələb olunduqda hər iki tərəf müvafiq iqtisadi və ticarət məsələləri üzrə işçi səviyyəsində məsləhətləşmələr apara bilər.

Polşa Rusiyanın Krakovdakı konsulluğunu bağlayır. Bu barədə Polşanın xarici işlər naziri Radoslav Sikorski bildirib. O, bu qərarı ötən il Rusiya kəşfiyyat orqanlarının Varşavada ticarət mərkəzində təşkil etdiyi təxribatla əsaslandırıb.

Konsulluğun tam olaraq nə vaxt fəaliyyətini dayandıracağı, hələlik, açıqlanmayıb.

Mayın 11-də Polşa hökuməti rəsmi olaraq Rusiya kəşfiyyat orqanlarını 2024-cü ilin mayında Varşavadakı "Marywilska 44" ticarət mərkəzini yandırmaqda ittiham edib.

Polşanın daxili işlər naziri Tomaş Semonyak və ədliyyə naziri Adam Bodnar X platformasında birgə bəyanat yayıb. Bəyanatda bildirilib ki, "Marywilska 44" ticarət mərkəzindəki yanğın "Rusiya xüsusi xidmət orqanlarının sifarişi ilə törədilmiş qəsdən yandırma nəticəsində baş verib".

"Biz yanğının törədilmə qaydası və gedişatı, həmçinin onun cinayətkarlar tərəfindən necə sənədləşdirildiyi barədə ətraflı məlumata sahibik. Onların fəaliyyəti Rusiya Federasiyasında yerləşən və şəxsiyyəti müəyyən edilmiş bir şəxs tərəfindən təşkil olunub və idarə edilib. Cinayətkarların bir neçəsi artıq saxlanılıb, digərləri müəyyən edilib və axtarışdadır", –bəyanatda qeyd olunub.

Varşavanın şimalında yerləşən ən iri ticarət mərkəzlərindən biri olan "Marywilska 44"də yanğın 2024-cü ilin mayın 12-də olub. Yanğın nəticəsində təxminən 1500 icarə obyekti məhv olub.

Alov çox qısa müddətdə və geniş ərazini əhatə etdiyi üçün ekspertlər elə o vaxt binanın qəsdən yandırılmasını ehtimal etmişdilər. Təxminən eyni vaxtda Avropa İttifaqına üzv başqa bir neçə ölkədə də oxşar aktlar törədilmişdi. KİV-lər öz mənbələrinə istinadən yazırdı ki, hakimiyyət orqanları Rusiya xüsusi xidmət orqanlarını şübhəli hesab edir. İddiaya görə, Rusiya xüsusi xidmət orqanları bu insidentləri törətmək üçün kriminal dairələri ələ alıblar.

Rusiya tərəfi, hələlik, Polşa tərəfinin açıqlamalarına və Krakovdakı konsulluğun bağlanmasına şərh verməyib.

Əfqanıstanda hakimiyyətdə olan Taliban idarəçiliyi ölkədə şahmat oyunlarının keçirilməsini "dini mülahizələrə" istinad və bu oyunun bir növ qumar olduğunu iddia edərək "dayandırıb".

Mayın 11-də Taliban rəsmisi deyib ki, ölkənin idman departamentinin himayəsi altında şahmatın ölkədə oynanılmasının mümkün bərpası ilə bağlı qərar veriləcək. Lakin o, bu qərarın nə zaman veriləcəyini deməyib.

2021-ci ilin avqustunda Əfqanıstanda hakimiyyətə yenidən qayıdan Taliban ölkədə idman və digər mədəni tədbirlərə bir sıra məhdudiyyətlər qoyub.

Əfqanıstanda qadınlara və qızlara idmanla məşğul olmaq qadağan edilib, idmançılara isə yarışlar zamanı hakimlərə və tamaşaçılara ayaqlarını göstərməyə icazə verilmir.

İdman idarəsinin sözçüsü Atal Maşvani AFP-yə bildirib ki, "şəriətdə şahmat qumar vasitəsi sayılır".

O, həmçinin Şahmat Federasiyasının rəhbərlik səviyyəsində bəzi problemlərinin olduğunu söyləyib.

"Bu məsələlərə diqqət yetirilməyənə qədər Əfqanıstanda şahmat idmanı dayandırılır", - o əlavə edib.

Kabildə sahib olduğu kafesində qeyri-rəsmi şahmat yarışları keçirən Əzizullah Gülzadə isə AFP-yə deyib ki, müsəlmanların çoxluq təşkil etdiyi digər ölkələrdə şahmata icazə verilir və bu oyunun qumarla müqayisəsi doğru deyil: "Bu gün gənclərin çoxunun əyləncə fəaliyyəti yoxdur, ona görə də bura çox adam gəlirdi. Onlar bir stəkan çay içər, dostlarını şahmat oyununa çağırardılar".

Birləşmiş Ştatlardan olan kardinal Robert Frensis Prevo Roma Katolik Kilsəsinin 267-ci rəhbəri seçilib. O, XIV Leo adını götürüb.

Prevo 1955-ci ildə Çikaqoda doğulub. O, seminariya təhsili ilə yanaşı, Villanova Universitetində riyaziyyat üzrə bakalavr, daha sonra Çikaqodakı Katolik ilahiyyat ittifaqında ilahiyyat üzrə magistr dərəcəsi alıb. 1977-ci ildə Avqustin ordeninə qoşulub və sonra uzun illər Peruda avqustinlərin missiyasında xidmət edib.

R.F.Prevo ilk amerikalı Roma Papasıdır.

ABŞ prezidenti Donald Tramp kardinal Prevonun seçilməsini alqışlayıb. "Roma Papası seçilən kardinal Robert Frensis Prevonu təbrik edirəm. Onun ilk amerikalı Papa olduğunu bilmək böyük şərəfdir", - Tramp "Truth Social" paylaşımında bildirib.

"The New York Times"ın yazdığına görə, XIV Leo Birləşmiş Ştatlarda doğulsa da, italyan və ispan dillərini bilir, lakin ingiliscə danışmır.

Roma Katolik Kilsəsinin əvvəlki rəhbəri Fransisk aprelin 21-də 88 yaşında insultdan ölüb. O, aprelin 26-da dəfn edilib.

Ukraynanın baş diplomatı Rusiyanın elan etdiyi atəşkəsi “saxta” adlandırıb, Moskvanı 72 saatlıq atəşkəsin birinci günündə bütün cəbhə xətti boyunca yüzlərlə pozuntuda suçlayıb.

Kiyevdə və Ukraynanın digər böyük şəhərlərində atəşkəs gecəyarısı qüvvəyə minəndən sonra sakitçilik olub, dron, yaxud raket zərbələri haqda məlumat gəlməyib.

Amma xarici işlər naziri Andrey Sibiha X postunda yazıb ki, 1200 km-lik cəbhə xətti boyunca fərqli mənzərə yaşanıb:

“Rusiya qüvvələri bütün cəbhə boyu hücumları davam etdirirlər. Gecəyarısından günortayadək 734 atəşkəs pozuntusu, 63 hücum əməliyyatı baş verib, 23-ü hələ də davam edir”.

Rusiya prezidenti Vladimir Putin Rusiyanın mayın 8-dən 10-dək cəbhədə atəşkəsə əməl olunacağını bildirmişdi. Mayın 9-da Qırmızı meydanda Qələbə paradı keçiriləcək. Rusiya 2-ci Dünya müharibəsində nasist Almaniyası üzərində qələbəni məhz həmin gün bayram edir.

Rusiya da Ukraynanı atəşkəsi pozmaqda ittiham edib. Amma Kiyev atəşkəsə əməl etmək öhdəliyi götürməmişdi. Prezident Volodimir Zelenski və digər rəsmilər deyirlər ki, Moskvanın niyyəti müharibəni bitirmək istəməsinin görüntüsünü yaratmaq, Qələbə Günü mərasimləri vaxtı Ukraynanın hücum etməməsinə nail olmaqdır.

Bəzi ölkə liderləri Moskvadakı paradda iştirak edəcək.