ABŞ prezidenti Donald Tramp mayın 8-ni rəsmən İkinci Dünya müharibəsində Qələbə günü elan edib. Bu barədə mayın 7-də Ağ evin saytında məlumat dərc olunub.
Tramp daha öncə "Truth Social" şəbəkəsində yazmışdı ki, 11 noyabrı Birinci, 8 mayı isə İkinci dünya müharibələrində qələbə günləri elan edəcək. O bəyan edib ki, Birləşmiş Ştatlar İkinci Dünya müharibəsində qələbədən ötrü "istənilən başqa ölkədən daha çox iş görüb".
1945-ci il mayın 8-də nasist Almaniyasının kapitulyasiya edib. ABŞ-də bu gün "Avropada qələbə günü" adlandırılır, çünki İkinci Dünya müharibəsi sentyabrın 2-də Yaponiyanın təslim olması ilə başa çatıb. 8 may Avropanın bir çox ölkələrində bayram edilsə də, ABŞ-də rəsmi statusu yox idi.
Tramp Ağ evdə çıxışında deyib ki, ABŞ-yə müharibədə müttəfiqlər kömək edib. O, Rusiyanın da adını çəkib. Amma yenə də qeyd edib ki, qələbə, əsasən, Birləşmiş Ştatların sayəsində əldə olunub.
Nasist Almaniyası ilə müharibəni ABŞ, Böyük Britaniya və SSRİ aparıb. Sovet İttifaqı Qərb müttəfiqlərindən dəfələrlə artıq itki verib. ABŞ isə hərbi ehtiyaclara yönəlik maddi resurslara görə müttəfiqlərini qabaqlayıb. Rusiya hakimiyyəti məhz SSRİ-nin və onun tərkibinə daxil olan Rusiyanın nasizmin darmadağın edilməsinə ən böyük töhfə verdiyini bildirir.